اليوم عندنا تجربة جديدة في أحدث مطاعم الرياض، والي كانها تجربة سرية لمطعم جزار، والسبب إن المطعم للآن ماله تواجد في خرائط جوجل، وطريقة وصول محرري مجلة “تذوق” كانت عن طريق دعوة أحد الأصدقاء والي جربه في مدينة جدة سابقاً.

مطعم جزار مطعم جديد فاتح على طريق الأمير تركي الأول، في حي المحمدية، مدينة الرياض

مطعم جزار مو لحاله في هالمكان، هو مشارك المساحة مع مطعم “شيفز” المعروف، وكلهم تحت مظلة شركة FBH القابضة (Five Brothers Holding). يعني الخبرة والجودة مضمونة – إن شاءالله- .

لقينا الطابور (الـ Q line) برا من كثر ما إن المطعم الآن ترند في مدينة الرياض، ودخلنا نكتشف السر. وهذي تفاصيل تجربتنا اللي بتخليك تتحمس تجربه إذا أنت من محي اللحوم!

أول شيء يلفت نظرك: جو الملحمة العصرية!

قبل ما تذوق أي شيء، عيونك بتاكل. الديكور في مطعم جزار يجنن! تحس إنك داخل ملحمة كبيرة، بس بستايل عصري ومرتب. الأرضية على شكل مربعات شطرنج، والجدران فيها طوب أحمر، وفوق تشوف أنابيب معدنية مكشوفة. الجو العام “حلو” وواقعي مع تجربة الطعام.

أكثر شيء يلفت انتباهك هو المطبخ المفتوح، اللي تشوف فيه الطهاة لابسين زي أحمر وهم يشوون اللحم قدامك! 🥩🍖 وحتى اللحوم المعتقة والسجق اللي معلق فوق الشواية يعطيك إحساس إنك في المكان الصح. والمكان كبير، فيه طابقين وجلسات كثيرة، بس الزحمة تخليك تحس إنك في فعالية مو مطعم.

الخدمة والطلبات: على قد الزحمة

بصراحة، والصدق ينقال، الخدمة في المطعم “معقولة” جدًا على قد الزحمة اللي فيه. الأطباق تجيك حسب الي يجهز، يعني ممكن الحمص يجيك قبل المشاوي! 😅

بس معليش، ممكن يكون مقبول في الافتتاحات الكبيرة، إذا تجربة الطعام تستاهل.

لكن فيه نقطة… أدوات الأكل (الشوك والسكاكين) كانت بلاستيك. والصراحة، هذا الشيء ما ناسب نوع الأكل اللي يقدمونها. نتمنى إنهم يغيرونها قريب عشان تكتمل التجربة!

اللحوم: طعم يخليك تسأل عن السر!

هنا مربط الفرس! الأكل في مطعم جزار حكاية ثانية. اللحوم طازجة ونكهتها قوية، والمشاوي عندهم مو زي أي مشاوي ثانية، تحس إنهم صدق مبتكرين.

أشهر الطلبات اللي ذقناها:

• الشقف: (شكلها زي اللي شفتوها في صورنا) اللحم يذوب في الفم! قطع لحم صغيرة ونحيفة مع شرائح شحم خفيفة تخليها تستوي صح وتكون طرية ولذيذة. تجيك مع خبز التورتيلا أو مخلل، وما عليك، ما بتوقف أكل منها.
• الحمسة: طبق تقليدي بس بلمسة جديدة، واللحم فيه طيب المذاق وحانط.
• شاورما: على بساطتها، بس طعم اللحم فيها ما يتغطى بالصلصات الكثيرة.
• فرانجيا و جاتو: أسماء غريبة وحلوة لأطباق لحم مبتكرة، بس الطعم يستاهل التجربة!
• والحمص باللحم مميز جداً على تجربتنا لأن أغلب تقييم الزوار إنه “فوق الوصف”! 🤤

كل هذه الأطباق تُقدم على أطباق معدنية بسيطة وريفية، تعزز فكرة الملحمة وتقدير اللحم كجوهر التجربة، وتضفي طابعًا أصيلًا على التقديم.

الأسعار: جودة عالية وسعر معقول

تخيل تاكل لحم بهذي الجودة والابتكار، والسعر يكون معقول. مطعم جزار قدر يوازن بين الأمرين. ربع كيلو شقف عندهم بـ 89 ريال، و”جاتو” بـ 99 ريال. الأسعار تعتبر “جيدة جدًا” مقارنة بالمطاعم الفاخرة، وهذا يخليه خيارًا رهيب لو تبغى تجربة فاخرة بدون ما تدفع مبلغ كبير.

وش قالوا الناس عن جزار؟ (بعض الاراء الي قريناها قبل التجربة)

• عن اللحم: “اللحمة نظيفة وطازجة ولذييييذة.”
• عن الأطباق: “الحمص فوق الوصف، شقف اللحم طري ولذيذ، حمسة اللحم هو الطبق الأروع لديهم.”
• عن الجو: “المطعم هذا على بساطته لكن الطعم من جد طيب وزاكي.”
• عن الأسعار: “الأسعار إلى حد ما جيدة.”

رأي ذويق “تذوق”

بالمختصر المفيد، مطعم جزار مو مجرد مطعم لحوم زيادة في الرياض، هذا مفهوم جديد، وتجربة فريدة، ووجهة سرية بفضل الجودة والابتكار.

نصيحتنا؟ يستحق التجربة إذا مزاجك يسمح أجواء الأفتتاح أو انتظر شويتين، وشاركونا وش كان طبقكم المفضل!

تقييم “تذوق”:

مع ما ذكر إلا أن هناك (نقطة خصم بسيطة فقط لجانب الخدمة الذي قد يتطلب بعض الصبر في أوقات الذروة، ونقطة استخدام الشوك والسكاكين البلاستيكية، وعدم توفر الملح والفلفل الأسود على الطاولات ولو طلبت ما تضمن تجيك، لكن المذاق يستحق كل ذلك).